- 5 августа, 2025
О “Трёх медведях” написали на вепсском языке
Скачать газету Kodima №07 (388) 2025 heinku (июль) Статья «“Koume kondjad” vepsän kelel» на 8 странице. Оригинал статьи:
Piteriš läksi eloho Lev Tolstoin “Koume kondjad” -kirjaine venän da vepsän kelil. Kändandan vepsän kel’he tegi necen kirjutusen avtor, a kirjaižen toimitai om kaikile vepsläižile tetab kel’tedomez’ Nina Zaiceva. Painusen sponsor om piterilaine vepsläine aktivist, dizainer Maksim Migukin. Mugažo oma vaumhed “Koume kondjad”-sarnan kändmižed ižoran da karjalan kelihe.Meletuz tehta “Koume kondjad” -sarnan kändand harvinaižehe kel’he oli minai jo lujas amu, völ konz openzimoi školas. Siloi minä meletin siš, miše pästta mugoine kirjaine hajenijal vodin kelel, no nece meletuz ei tulend eloho. |
2023. vodel mugoine-žo idei möst tuli minun pähä, no siloi meletin jo ižorankeližes painuses. Minai om hüvä tutab – bab Žanna F’odorovna Stepanova, Gatčina-lidnan eläi, hän om üks’ jäl’gmäižišpäi ižoran kelen tedajišpäi. Tundištimoi Žanna F’odorovnanke Vistino-küläs völ 2018. vodel, ižoran praznikan jäl’ghe. Siš aigaspäi erašti kävun hänennoks adivoihe, naprin pagišta hänenke ižoran kelel, starinoičen ičein elos. Muloi vilukus tulin hänennoks sen täht, miše käta “Koume kondjad” -sarn ižoran kel’he. Se ei olend kebn, no Žanna F’odorovna mahtoi tehta sen lujas hüvin: hän lugi sarnan venäkeližen tekstan än’heze da sid’ virkoi sanundoid ižoraks, hänen pagin kirjutadihe diktofonale. Sen jäl’ghe minä toimitin necen tekstan, no kaik-se el’genzin, miše pidab toimitada se völ kerdan ühtes kel’tedomehenke Mehmet Muslimovanke, kudamb tedab ižoran kelen erigoičusid lujas hüvin. | Konz starinoičin meletuses pästta “Koume kondjad”-kirjaižen eloho ičein sebranikale Maksim Migukinale, kudambanke mö tundištimoiš endemuloižil vepsän kelen kursil Piteriš da sid’ tegim vepsänkeližen onlain-kändajan, hän hökkähti antta rahad neche azjaha da tariči käta “Koume kondjad” völ vepsän da karjalan kelihe. Sanuin, miše käta sarnan vepsän kel’he voižin iče-ki, a tehta kändandan karjalan kel’he pakičin ičein sebranikad Petroskoin universitetaspäi Ivan Kalmikovad, kudamb opendab karjalan da suomen kelid. Ivan om sündnu karjalaižehe Vel’järv-külähä, i karjalan kel’ om hänen mamankel’. Hän tegi sarnan kändandan karjalan kelen livvin paginaha da andoi sen toimitamha karjalan kelen opendajale Kinerma-küläspäi Nina Barminale. Toimitamižen jäl’ghe völ tegin keskznamoiden kohendusid. |
Vepsänkeližen kändandan toimiti Nina Grigorjevna Zaiceva – kaikile vepsläižile tetab kel’tedomez’, vepsän kirjkelen sädai, openduzkirjoiden, vajehnikoiden da äiuguižiden monografijoiden tegii, “Virantanaz”-eposan avtor, “Kalevalan” da Uden Zavetan kändai. Aigemba hän toimiti minun “Penikaižen princan” kändmižen-ki. Tahtoin sanuda hänele sur’-sur’ spasib abus! Keväz’kus Maksim Migukin pästi eloho ižorankeližen kirjaižen probuindtiražan (i sen tagut minä jo voin lahjoita necen kirjaižen Žanna F’odorovnale), a kezakus hän pästi vepsänkeližen-ki tiražan, i nügüd’ kirjaine voib pakita vepslaine.ru-lehtpolel. Ku tö tahtoit lugeda Lev Tolstoid vepsän kelel, algat kadotagoi mugošt voimust! Maksim Kuznecov, Kazanin tedokeskusen tedoradnik |